٥٢ إثنين | 7. أشياء تعلمتها من دراسة الأزياء

الأحد، 21 أكتوبر 2018


الأسبوع الماضي قررت أغير عن المواضيع الجديّة ونسولف في لايف انستاقرام (iMeshael@) عن شي ممتع، وما توقعت إنكم تتحمسون كذا

موضوعنا كان عن أكثر أشياء أفادتني تعلمتها لما درست كورس الفاشن، اللي تعلمته كثير لكن هذا اللي بيمديني أشاركه معاكم

15 أكتوبر 



واحدة من عادات أبوي الله يرحمه اليومية كانت، كل يوم يرجع من الدوام معاه جرايد اليوم. وبعد فترة صار يوم الأربعاء هو اليوم اللي تصدر فيه جريدة الحياة ومعاها مجانًا كانت تجي مجلة لها في بداياتها، إلى ما ازدهرت وصارت تباع بـ 5 ريال. 

من هنا بدأ اهتمامي بالموضة والأزياء وكانت هي وسيلة الترفية الوحيدة في غياب الإنترنت، وكنت أعرف مين مصمم الفستان بمجرد ما أشوفه على التلفزيون. تحسنت ذائقتي بشكل عام واكتشفت حبي لهذا المجال

2014 كانت أول زيارة لي لباريس، وهذي كانت نقلة نوعية في هذا الجانب من حياتي .. بالإضافة لجمال البناء العمراني، وأجواء المدينة الساحرة واللغة المدهشة الجديدة على إذني من متحدثينها الأصليين، انبهرت بكمية وجمال البوتيكات الصغيرة المليانة تصاميم راقية ما سبق لي شفت مثلها، بعضها كانت لمصممين عالميين معروفين والبعض الآخر كانت معروفة محليًا وأول مرة أسمع فيها. وجودي هناك حسسني إني لازم أتعلم و أعرف أكثر عن هذا المجال، والمهمة الأولى اللي كانت في قائمتي أول ما أرجع السعودية هو إني أتعلم تنسيق الأزياء. تنسيق الأزياء مختلف عن تصميم الأزياء بإنك في الأول تظهر إبداعك في ترتيب وتنسيق القطع مع بعض بما يتناسب مع شكل جسم الزبونة مقارنة بالتصميم اللي يركز على تصميم قطعة مبتكرة أو كلاسيكية لكن بلمسات تعكس فكر المصمم نفسه

رجعت السعودية في منتصف شهر أكتوبر وبدأت رحلة البحث عن مكان يعلمني مبتغاي، وقتها لقيت موقع Fashion Styling Institute يقدم كورسات أون لاين لمواضيع مختلفة مرتبطة في مجال الأزياء، قرأت مراجعات الطلبة السابقين وكانت إيجابية وأذكر إن مبلغ الاشتراك كان مناسب، وفعلًا سجلت وكانت مدة الدراسة 3 أشهر إذا تمكن الطالب من تجاوزها بيكون منسق أزياء معتمد

كثير أشياء تعلمتها خلال هذه الفترة أضافت لي، ورتبت أفكاري وحلت ألغاز كانت في راسي من قبل وخلتني أعرف ليش بالنظر كنت أشوف أشياء وقطع شكلها أجمل من لو تنسقت مع قطع ثانية


التناسب

وحدة من أهم وابسط النقاط اللي لازم كل بنت تنتبه لها وقت اختيار ملابسها لأنها تغير في المظهر العام بشكل كبير. النقشات و التشجيرات والنقط والتخريمات ضروري تكون متناسبة مع حجم الجسم. بمعنى، البنت اللي جسمها عريض أو ممتلئ تلجئ للتشجيرات والنقشات اللي تكون كبيرة شوي وتبتعد عن أي شي فيه نقشات أو نقط صغيرة، لأن بيكون الفرق بين حجمها وحجم الرسمات كبير جدًا وبيظهرها بمظهر أكبر من مظهرها الحقيقي. نفس الشي للبنت اللي حجمها صغير Petit، تبتعد عن التخريمات الكبيرة أو النقشات الكبيرة جدًا لأنها بتكون أصغر من حجمها الحقيقي. ضروري يكون حجم الجسم متناسب مع كل شي موجود في الزي، النقشات ، الاكسسوارات، طول الكعب وحجمه، وحجم شنطة اليد


التضاد بين البشرة والشعر وخامة اللبس 

المعلومة اللي انصدمت فيها لما عرفتها! الهدف من تنسيق الملابس مو بس ترتيب قطع حلوة على جسمك، لكن مهم يكون شكلك النهائي مريح لك قدام المرايا وللناس اللي بتقابلك، ووحدة من الأشياء اللي غافلين عنها هو كيف تختارين القماش المناسب لنوع شعرك وبشرتك. حاولي قدر الإمكان ما يكون التضاد بينهم عالي، يعني لا يكون شعرك أملس مرة وتلبسين قماش خامته ثقيلة وخشنة، أو شعرك أجعد أو بشرتك فيه مشاكل وتلبسين حرير سادة، حاولي توازنين بينهم ويكون فيه تناسق بالمظهر العام. هل معناه اللي شعرهم أجعد ما يقدرون يلبسون حرير؟ لا طبعًا! ممكن تلبس حرير وفوقه قطعة ثانية تتناسب مع طبيعة شعرها، أو حرير مشجر يخفف من مظهر نعومة القماش
قد ما تقدرين حاولي تكون خامة شعرك وطبيعة بشرتك وقماش ملابسك من نفس العائلة


الـ Under Tone والمجوهرات 

درجات بشرتنا ما تعتمد بس على ألواننا الخارجية، اللون الباطن أو الطبقة الخفية من الجلد  (Under Tone) لها تأثير على درجة البشرة سواء كانت باردة أو دافية، وبالتالي ايش الألوان اللي تناسبها، كنت أعرف هذا الشيء لكن ما كنت أعرف إنه يأثير بعد على مدى مناسبة لون المجوهرات اللي نلبسها (فضي، ذهبي أو ذهبي وردي)!

كيف أعرف بشرتي أي نوع؟ 
من أبسط الطرق هي إنك تشوفين لون العروق في الجزء الداخلي من المعصم هل هي قريبة من اللون الأخضر أو الأزرق والبنفسجي؟ 
في حال كانت قريبة من الأخضر فبشرتك أقرب للدافية وبتناسبك المجوهرات الذهبية أكثر، أما لو كانت قريبة من الأزرق أو البنفسجي فبشرتك أقرب للباردة وبتناسبك المجوهرات الفضية أكثر. فيه بنات فيهم كل الألوان فهنا جربي وشوفي ايش يناسبك أكثر واحتمال كبير يكون الذهبي الوردي. هل معناه لو بشرتي باردة ما اشتري شي لونه ذهبي والتزم باكسسوارات وحدة؟ لا طبعًا لكن استثمري فلوسك في طقم فضي مرتب ومجوهرات يومية مناسبة، وممكن تلبسين شي ذهبي حلو حسب اللي يناسب طلتك بالأخير


القيمة الحقيقية

كثير مرات ننبهر بقطع إن سعرها رخيص أو مناسب ونشتريها وتجلس في الدولاب ما تنلبس أو تنلبس مرة وحدة وتبقى حبيسة الدولاب للأبد. وقطع ثانية نستغليها ونتركها ونمشي وهذه في الحقيقة مو الطريقة الصحيحة لحساب قيمة القطعة سواء كانت فستان أو شنطة أو الله يكرمكم حذاء

قيمة القطعة = مبلغ الشراء (مقسوم على) عدد مرات لبسه 

يعني لو اشتريتي فستان من زارا بمبلغ 499 ريال (صايرين يوصلون لهالاسعار)، وفستان من self portrait بـ 1800 ريال

  • فستان زارا لبستيه مرتين في مناسبتين مختلفة، قيمته باللبسة الوحدة كانت: تقريبًا 250 ريال
  • فستان سيلف بورتريه لبستيه 5 مرات في مناسبات مختلفة، قيمته في اللبسة الوحدة كانت: 360 ريال
  • كعب كلاسيك لونه مطابق لبشرتك من كريستيان لوبوتان اشتريتيه 2800 ريال، لبستيه 12 مرة (لأنه مناسب لسهرات وعزايم) قيمته في اللبسة الوحدة: 234 ريال
  • كعب على الموضة من زارا اشتريتيه بـ 499 ريال، راحت موضته وأنتِ ما لبستيه إلا مرتين قيمته في اللبسة الوحدة: تقريبًا: 250 ريال

الفكرة مو إنك تشترين شي غالي عشان تلبسينه أكثر من مرة، لكن إنك تفكرين زين قبل لا تشترين القطعة: هل أنا بلبسها أكثر من مرة وأطلع قيمتها وإلا بتصير خسارة علي؟ 

.
.

تحياتي 





0 comments:

إرسال تعليق