بعد يوم ميلادي الماضي، حددت لنفسي مجموعة أهداف بودِّي احققها قبل يوم ميلادي الجاي.
واحد من أهم هذه الأهداف كان ممارسة القراءة بشكل منتظم، خاصة انه خلال الفترة الماضية قراءتي للكتب قلّت كثير لأسباب مختلفة أتوقع أولها كان إنشغالي بالعمل والإرهاق التام بعد يوم طويل فيه؛ وسبب اخر هو اني ما عرفت نوعية الكتب اللي استمتع بقراءتها .. فكان الوضع كالتالي:
حددت هدفي بشكل أوضح وكان: انتهي من قراءة ١٢ كتاب على الأقل إلى يوم ميلادي الجاي (بمعدل كتاب واحد في الشهر) ويعتبر رقم صغير لكن كبداية بالنسبة لي جيد!
بدأت القراءة ولاحظت بعد فترة ان بعض الكتب اللي أنهيت قراءتها أكون نسيت جزء كبير من المحتوى اللي كان عاجبني ومستمتعة فيه وقت القراءة. حسيت اني ما حققت الهدف الأساسي من القراءة وهو الحصول على أقصى فائدة ممكنة من الكتاب، فقررت أبدء أخطط أو أظلل على الأجزاء اللي اعجبتني من محتوى الكتاب بحيث يكون الوصول لها في المستقبل أسرع وصار الوضع أفضل.
مع أن الوضع تقدم عن قبل؛ لكن لا زالت المشكلة قائمة وسالفة النسيان مستمرة، فبدأت ابحث عن أفضل الطرق للقراءة الفعالة إلى ما لقيت فيديو في YouTube لقارئ نهم! قال: ان أفضل الطرق اللي جربها كانت الكتابة!
(ملاحظة: الطريقة غير مناسبة للكسالى P:)
١) اختاروا كتاب بمحتوى مناسب لكم، وقبل شراء الكتاب ابحثوا عنه وعن رأي قراء آخرين عنه .. جربوا موقع Goodreads .
٢) حددوا جزء من يومكم لممارسة القراءة بحيث يكون هذا الوقت للكتاب وبس.
٣) خصصوا دفتر للكتب اللي تقرأونها.
٤) في وقت القراءة حددوا الأجزاء اللي اعجبتكم من محتوى الكتاب.
٥) بعد الانتهاء من القراءة .. اكتبوا في الدفتر الأجزاء اللي اعجبتكم وخططتوها بس.
وفعلًا، بدأت بتطبيق الطريقة وكانت النتيجة ممتعة! كل اللي عليكم هو كتابة عنوان الكتاب وإضافة الأجزاء اللي اعجبتكم من الكتاب كنقاط تحت العنوان .. وبكذا يكون مرجعكم هو الدفتر وبإمكانكم إعارة الكتاب لشخص ثاني بدون ما تشيلون هم انكم محتاجين شي من الكتاب.
بإمكانكم إضافة تفاصيل زيادة مثل من صفحة كم إلى كم وتاريخ اليوم عشان تعرفون الوقت اللي احتجتوه لقراءة الكتاب ولمتابعة تطور قراءتكم مع الوقت.
شاركوني انواع الكتب اللي تفضلون قراءتها، وأيش روتينكم لما تقرون كتاب؟
المشاركات
